Баян-Өлгий аймгийн Биеийн тамир спортын газрын дарга Х.Хайнар Бүгд Найрамдах Казахстан Улсын Биеийн тамир, спортын академийн доктор, профессор PhD Кенжин Жаксат Болатович, Кожамуратов Нуркожа нарыг хүлээн авч уулзлаа.
Уулзалтын үеэр доктор, профессор PhD Кенжин Жаксат Болатович тус академийн үйл ажиллагааг танилцуулж, спортын боловсролын чиглэлээр орчин үеийн сургалтын хөтөлбөрүүдийг санал болгож буйгаа онцолсон. Тэрбээр манай аймгийн залуучуудыг академид элсүүлэх зорилгоор ажиллаж байгаагаа дурдсан бөгөөд тус сургуулийн давуу тал, мэргэжлийн болон хувь хүний хөгжлийн боломжуудын талаар мэдээлэл өглөө.
Тус академи Астана хотод байгуулагдаж үйл ажиллагаагаа эхлээд 3 жил болж байгаа ба Орос, Украин, Узбекистан, Монгол зэрэг олон орны оюутнууд суралцдаг. Гадаадаас элсэгчид тэтгэлэгт хамрагдах боломжтой аж.
Бакалаврын сургалт гурван жилийн хугацаатай, төгсөгчид нь спортын салбарт мэргэжлийн өндөр ур чадвар эзэмшдэг байна.
Энэхүү академи нь Казахстан улсын "Биеийн тамир, спортыг 2025 он хүртэл хөгжүүлэх үзэл баримтлал"-ын хүрээнд байгуулагдсан бөгөөд олон нийтийн спортын хөгжлийг дэмжих зорилготой юм.
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.